Narkotik vasitələrin qanunsuz dövriyyəsinin qarşısının alınması istiqamətində polis əməkdaşları tərəfindən əməliyyatlar davam etdirilir.

Ulutv.info DİN-ə istinadən xəbər verir ki, növbəti tədbirlər zamanı İrandan ölkəyə narkotik vasitələri qaçaqmalçılıq yolu ilə gətirən daha 7 nəfər - 1993-cü il təvəllüdlü Həsən Hacızadə, 1991-ci il təvəllüdlü Emil Əliyev, 1987-ci il təvəllüdlü Rüfət Mehdiyev, 1999-cu il təvəllüdlü Nəriman Səfərov, 1982-ci il təvəllüdlü Hamayıl Abdullayeva,1986-cı il təvəllüdlü Vüqar Həsənov və 1989-cu il təvəllüdlü Yusif Məmmədov Nərimanov Rayon Polis İdarəsinin əməkdaşları tərəfindən müəyyən edilərək saxlanılıblar. Onlardan 24 kiloqram, o cümlədən güclü təsirə malik 9 kiloqram heroin, 3 kiloqram “patı”, “şüşə” kimi adlandırılan metamfetamin, 12 kiloqram tərkibi psixotrop maddələrlə zənginləşdirilən marixuana, 800 ədəd "metadon" həbi və elektron tərəzilər aşkar edilib.
Araşdırmlarla saxlanılanların şəxsiyyətləri istintaqla araşdırılan "Səid" və “Abbas” adlı İran vətəndaşları ilə qabaqcadan əlbir olaraq narkotikləri satmaq məqsədilə əldə etdikləri müəyyən edilib.

Faktlarla bağlı Cinayət Məcəlləsinin müvafiq maddəsi ilə cinayət işləri başlanılıb. Bu şəxslərin daxil olduqları dəstənin digər üzvlərinin saxlanılması istiqamətində əməliyyat-istintaq tədbirləri davam etdirilir.

Qeyd edək ki, 2023-cü ilin əvvəlindən Nərimanov Rayon Polis İdarəsinin əməkdaşlarının həyata keçirdikləri əməliyyatlar zamanı ümumilikdə 60 kiloqramdan artıq müxtəlif növ güclü təsiredici xassəyə malik narkotik vasitə qanunsuz dövriyyədən çıxarılıb.