Cəlilabad Rayon İcra Hakimiyyəti Başçısının Cəlilabad Şəhər Ərazi Nümayəndəliyi "Topxana Layihə İnşaat” MMC ilə maliyyə dəyəri 394 817,84 AZN təşkil edən satınalma müqaviləsi imzalayacaq.

Ulutv.info Qaynarinfo-ya istinadla xəbər verir ki, şirkət qurumun Cəlilabad şəhərində yolların əsaslı təmiri ilə bağlı keçirdiyi tenderin qalibi seçilib.

"Topxana Layihə İnşaat” MMC 17 aprel 1996-cı ildə qeydiyyata alınıb. Nizamnamə kapitalı 110 010 AZN olan şirkətin hüquqi ünvanı Bakı şəhəri, Xətai rayonu, Əhmədli qəsəbəsi, Cavanşir küçəsi, ev 27, mənzil 39-da yerləşir. MMC-nin qanuni təmsilçisi Ələkbərov Fuad Vaqif oğludur.

Şirkətin adı 2021-ci ilədək RRT LTD Firması kimi qeyd edilib. RRT LTD Firması 2007-ci ildə qeydiyyata alınıb. 2021-ci ildə "Topxana Layihə İnşaat” MMC-yə çevrilib. Bu halda "Topxana Layihə İnşaat” MMC-nin 1996-cı ildə qeydiyyata alınması başa düşülmür.

"Topxana Layihə İnşaat” MMC 2023-cü ilin iyun ayına qədər 10 manatlıq nizamnamə kapitalı ilə fəaliyyət göstərib. Həmin ayda nizamnamə kapitalı artırilaraq 110 000 AZN-ə çatdırlıb.

Şirkətin nizamnamə kapitalı artırıldıqdan sonra tenderlərdə fəal iştirak etməyə başlayıb və 45 tenderin qalibi seçilib. Bu tenderlərin əksəriyyəti iri məbləğlidir.

"Topxana Layihə İnşaat” MMC-nin qısa müddət ərzində tender kralına çevrilməsi şirkətin hansısa səlahiyyətli şəxsə məxsus olması barədə şübhələrə yol açıb.

Cəlilabadın yollarına gəlincə, şəhər nümayəndəliyi 2022-ci ildə yolların təmirinə 346 146,68 AZN, 2021-ci ildə 504 662,4 AZN, 2020-ci ildə isə 651 965,33 AZN xərcləyib.

Cəlilabad Rayon İcra Hakimiyyətinin başçısı Rafiq Cəlilovdur. O, 2021-ci ildən bu vəzifədədir. Rafiq Cəlilovun Cəlilabad şəhəri üzrə nümayəndəsi isə Ramil Əmənovdur. Ramil Əmənov bu vəziəfəyə 2022-ci ildə təyin edilib.